اكلات مصريه فظيعه

الكرشة والممبار
اهم شئ التنظيف ثم التظيف ثم التنظيف وقبل التنضيف تجيبيها من جزار تعرفيه كويس
لازم اولا يتنظفو كويس انا شخصيا اى حاجة لونها مش ابيض بشيلها
الكرشة:
تتنظف ثم تتنضف وبعدين ندعكها بلمون وملح وخل ونشطفها كويس
وبعدين نحطها فى حلة وحليها بصل وتوم وملح وتوابل وصلصة طماطم وعصير طماطم ونسيبها على النار لغاية ما هى تنزل الميه بتاعتها الافضل تقلبى البصل و بعدين التوم وبعدين الكرشة تقلبيها معاهم على النار شوية وبعدين زودى الطماطم وسيبيها شوية وبعدين زودى ميه حسب الحاجة
بس اقول لكم الصراحة انا مبعملهاش
مش بقرف بس بيتهيالى انها ملهاش اى قيمة غذائية لانها لا لحم ولا عظم وانما جلد يعنى اكيد مفيهاش اى بروتين او عناصر غذائية
الممبار
بس برضه اشتريه من حد تعرفيه " بيتهيالى كل الناس فى مصر كل عيله ليها الجزار اللى بتثق فيه"
وبعدين اغسليه بمية واقلبيه وشيلى بالسكين بس برفق عشان ميتقطعش اى شئ جواه "الجزء الاصفر" وادعكيه طبعا بلمون وملح وخليه فى اللمون شوية
وبعدين قطعيه حسب ما تحبي انا بحب اعمله قطع صغيرة عشان تتاكل على طول او ممكن تعمليه قطع كبيرة وتقطعيه عند التقديم
وتجيبى الخلطة فى ناس بتستعمل خلطة المحشى العادية "رز وصلصة و بقدونس "
بس انا بحب اعمله برز وبعدين نص الطماطم عصير والنص التانى مقطع قطع صغيرة جدا جدا وطبعا بقدونس وتوابل " كدة اخف لانه هيتقلى كمان مش يبقى مقلى ومسبك مع بعض كتير
وبعدين تفتحتى الممبار وتحشيه ثبتى طرف من الممبار على الصينية اللى فيها الرز وامسكى الطرف التانى بايديكى الاتنين وافتحيه وبعدين دخللى الرز باطراف اصابعك
لا تحشيه للاخر واتركى مسافة لنضج الارز
وبعدين تحطى ميه على النار تغلى وتحطى فيها الممبار واحدة واحدة ووطى النار حتى لا ينفجر و هتلاقيه انكمش وبعدين لما اتحسى الرز نضج ممكن تختبريه بسكين بس كونى حريصة جدا
وبعد النضج طلعيه فى مصفاه ثم حمريه فى الزيت
طريقة المحشى
تحطى الرز وعليه التسبيكة و الملح و التوابل اللى تحبيها وبقدونس وشبت وبعدين تحطى الخلطة دى على النار وتزوديها مية قليل " شبه طريقة تسوية رز الحشو للحمام" وتسوى الرز نص سواء وبعد مايرد
تاخديه وتحشى سواء البادنجان او الفلفل او الكرنب او الكوسة " بس الورق عنب " مش ينفع بالطريقة دى وبعدين تحطيه فى صينية فرن وتزودى مية قليل تقريبا نص كمية المية اللى بتحطيها على المحشى بالطريقةالعادية
وتدخليه الفرن وتغطيه بورقه فويل حتى ينضح "حوالى تلت ساعة" وبعدين تشيلىالفويل وتفتحى الشواية عليه لحد ما يحمر وجه المحشى ...... طعمه تحفففففففففه وشكل الصينية على السفرة يفتح النفس
بس طبعا تصلح لكمية محشى قليلة يعنى لو هتعمليه طبق جانبى فى عزومة مثلا
الذرة المشوى:
وهى سهلة جدا درة وبنشويها يا اما على الفحم يا ام اعلى النار بس لازم لو هتشويها على البوتجاز تمسكيها ممكن باللى بنطلع بيها الجاتوه وتحطيها على نار هاديه وتقلبى باستمرار وتقفى عليها مش تسيبيها على النار وتمشى
بس انا اعرف طريقة تانية :
نجيب اكواز الدرة ونقسمها اتنين ونحطها فى دماسة الفول ونحط عليها ميه وملح وكمون ونحطها على السخان" عين بوتجاز كهربائى" او على نار هادية جدا مع وضع الشياطة بنفس طريقة الفول المدمس وبعد ما تستوى اعصرى عليها لمون
بجد حلوة و فى الخليج بيعملو الذرة المسلوقة دى فى محلات بره كتير لكن مفصصه مش اكواز وبيعملوها بمذاقات كتير يعنى فى بالجبنة وفى باللمون وفى بالشطة
وكمان فى محلات تشيليز دايما بيقدموها مع الاكل " انصاف اكواز"

» اكلات مصريه -اكلات مصرية -الاكلات المصريه -الاكلات المصرية -بالصور
» اكلات مصرية ( فول - فلافل - بصارة - شوربة عدس - الكشرى المصرى )
» اول فيديو لمترو الانفاق الجديد صناعه بأيد مصريه‬